***欣圖軒***

香港洲際酒店地下

自從進入這間公司，唯一能稱之為欣慰的，是一直都有食神眷顧！(希望唔好比佢停啦，如果唔係，返工仲有乜野意義可言呢！)
昨日"爆冷"贏了打0比，同事戶口又有進帳，所以又帶我去食好東西！
同事問我有否約人食飯，我見她心情如此的好！當然約左人都話無約啦！(而且實情是我根本無人約！)她問我想食咩，0係呢D環境，我當然無意見啦！於是，她便提意去麗晶果間中餐廳。咁當然，0係呢D時候，我二話不說就打開我既飲食資料庫，一check，'啊！麗晶即係宜家既洲際啦！中餐即係欣圖軒啦！就0係我講完個'啦'字既同時，我隻手就打完個電話號碼喇！'
"您好！一點兩位姓黃唔食煙，電話XXXX XXXX，嗄！得番食煙咋，嗯！咁好啦。"

一點去到，餐廳都坐左7成人喇！都唔知點解會有咁多國內人仕既？
一坐低，環境固之然是好，但最吸引我視線的是一套綠色仿玉的勺子托，勺子及筷子托。這是我見過，最有心思的搭配。小食糖核桃，好鬆，好好食。
侍應拿了兩本很重的菜單過來，而點食的責任，當然留給同事啦。
她叫了魚翅燒賣($45)，鮮蝦腸粉，星州炒蘿蔔糕($65)，芋頭帶子酥鴿，同事知我鐘意食甜品，就問我食唔食蓮茸焗布甸(因為我同佢去親翠亨村飲茶，必叫的)，但我又見到有個叫紫米西米栗茸焗布甸，都係同蓮茸焗布甸一樣價錢，$35，所以就齊齊試新野喇！
在等待食物的同時，侍應拿來三小碟醬料(3種不同程度的辣醬)，果然夠細心。(總比福臨門好吧，福記淨叫一碟指天椒豉油都要$30啦！無天理。)
首先一上桌，就黎碟鮮蝦腸粉，味道ok啦！不過就有四條：平時例必唔食燒賣既我，今趟都要隊兩粒，並不是覺得魚翅特別矜貴，而係同事叫到，唔好意思唔食姐。反而覺得幾好既係星州炒蘿蔔糕，無平時食既XO醬蘿蔔糕咁油膩；佢D蘿蔔糕又唔削，仲有d菜甫碎夾雜其中，口感唔錯。而芋頭帶子酥鴿就不過不失啦！毫無驚喜可言，唯一慶幸是不太油，做得幾鬆化。
到最後，我熱切期待的甜品，反而最不知所謂！買相扣十分，我那份更像被老鼠偷吃了一口，唉！反正就是難食。不提也吧！
最後，盛惠$321.2

嘩！多謝Joe姐~~~

D.