如果可以的話...

今年要走很多場婚宴，明年也是；最慘是一天要走兩場，中午出席這對的ceremony，晚上就去吃那對的翅！

女人對婚姻有憧憬，無可厚非；對自己的婚禮有要求，亦屬正常！你可以說一生人一次咋喎(如果有幸是真的)，梗係要攪好D啦！啱丫！無錯架！

但是，如果，有幸我嫁得出的話，我希望可以：

1. 唔影婚紗相得唔得呀，我我我覺得唔影都ok囉；吓！留念！唔使啦！
2. 我出門呢，其實唔使成村人衝上黎架喇！千祈唔好玩新郎丫，唔該！娶左我，我都玩佢成世啦，唔好再攪喇；但重點係我自己都唔覺得接新娘D遊戲有幾好玩囉-_-"
3. 兄弟姐妹團，唔使架喇，一對伴郎伴娘夠架喇！題外話：市面上的姐妹(我也做了N次)，如果唔係太凍的話，影相時，可唔可以唔好個個都嬲住條紗巾呢(！！！)
   
4. 唔使擺酒，同親人摯友食餐便飯就算啦，唔該！
5. 但如果真係要攪的話，我唔想一餐飯要換幾套衫囉，我不是模特兒啊！
6. 阿奶奶，媽咪牙！你放心！我呢...其實唔帶龍鳳鈪都無所謂架，金器呢，我唔使咁多架，你都唔好叫D姨媽姑姐呢，嘥錢買啦，家下D金貴呀，我唔使排場架喇！同埋呢，我想講呢，成身金，同條裙好唔襯呀！
7. 我進場，唔使放花炮架喇，無驚喜之餘，又破壞環境，仲要攪到我成頭七彩紙碎呀，大佬！
8. 多謝雙親既動人說話，我想私底下同佢地講囉！
9. 唔表演kiss有乜問題先，我真係唔覺得有乜咁好睇播~
10. 嗯！所有好意頭既菜式，因為我都有份食既關係，可唔可以作出適當既改動呀，我其實唔係好鐘意食翅架咋，改羅宋湯，得唔得呢？你睇，紅噹噹，幾喜慶^-^

最後，【我希望我爸爸媽媽同未來老爺奶奶，千祈唔好知道我有呢D想法】，如果唔係，佢地一定會嘔到一地血之餘，我的下場也不會見得好好！

OKOK！噏完一大輪，即係點，
我即係懶同怕煩囉！
講完。

D.