功課

人：我、九歲小童、小童媽媽
地：小童家
事：導促九歲小童，做其「慘過擔泥」的苦差：【功課】

在下：你做啦！乖啦！
小童：我唔識做呀！(於是他玩擦膠)
在下：黎！我教你啦！一齊做啦好無！
小童：唉！佢地兩個又話離婚喇！日日都話離，好煩呀！
在下：下！咁你想唔想佢地離丫？
小童：要離未離囉！成日都嗌交！嘈到死！
在下：咁你有無勸佢地唔好嗌呀？
小童：我都費事理佢地呀！我番入房訓教！
在下：咁你有無唸過點解佢地成日嗌交丫？(衰仔，未又係為左你！)
小童：我唔理喇！
在下：喂喂！做左呢題先..
小童：(揸住支筆，繼續發呆)，D姐姐，我可唔可以食左個tuna魚飯團先呀？
在下：唔可以，做完先...
小童：係未做完兩行就可以呀？
在下：我唔同你講野，你寫左先啦！
小童：你都唔知呀XXX幾衰呀！(XXX是他同學)，佢話我....，阿Miss Chan偏心，幫住佢呀！
在下：我唔聽，你做完我地先傾偈！....你寫啦...寫個「的」字呀....乖啦！點解識都唔寫呀！
小童：(佢寫在兩隻字咁大把，佢開始自己唱歌。無錯，佢開始唱詩歌比我聽！！！)
在下：你點解唔好好地做埋D功課佢，之後未好多時間可以玩囉！
小童：你今日會選邊個呀？我最憎葉劉架喇！
在下：點解要憎佢呀？
小童：佢喺廿三條果時，講D咁既野！好黑人憎呀！宜家又學人出黎選...
在下：好喇好喇！做完我地先討論
小童：(佢無理我，在作業簿上畫上花兒一朵，無錯...是花兒一朵)
(我其實真係有個衝動，同佢做晒佢，唉！仲慘過自己做呀！老天爺！)

童母進來，大喊：下！仲未做完！！！
小童：我想去廁所......(衝左出去！)
在下：好想死呀！
童母：我日日都想架啦！(之後出去捉番小童入黎)
大家各就位~
在下：乖啦！做完呢題，就食個tuna魚飯團啦！
小童：係未架...(兩行鬼畫符即刻標出黎...即係寫左等如無寫...要擦過晒)
小童：我要食.(很開心地吃吃吃....)
在下：(我望住佢...無言！！！)
童母又再次入黎，大喊：又食野...就黎食飯喇.
小童：(見門打開，馬上衝出去，說：我要飲益力多.....)

唉！

大家各就位~
童母：媽咪教你唔掂喇！我同daddy要搵定boarding school啦！
小童：使乜搵boarding school丫！唔使搵啦！直接送我去孤兒院未得囉！
童母：點解你要咁樣丫？咁唔爭氣丫？daddy媽咪咁錫你，你咁唔聽話？ 媽咪唔識教你喇！
小童：咁唔鐘意我，未殺左我囉！

唉！

在下：好喇好喇！我地做埋呢兩行，就去食飯啦！媽咪去換衫先啦！
小童：我今次英文朗誦節輸左比個混血兒呀！
在下：下！係牙！
小童：因為個評判係英國人，咁個混血兒既daddy又係英國人，就係因為佢既英國口音，佢贏左我。
在下：如果去外國讀書，你想去邊到呀？
小童：我去英國。
在下：點解呢？
小童：因為我去英國，就會學倒英國口音。咁我到時返黎參加朗誦節就會贏番佢。
在下：下！就係咁咋！點解唔揀美國呢？
小童：美國成日有校園槍擊案呀！會死架喎.
在下：下！英國有連環爆炸喎！咪死得仲多...
小童：咁又係喎~

夠鐘食飯...
功課依然未做...

唉！

D.